بسم الله الرحمن الرحيم
هي من اولها بدايه او نهايه = هي حقيقه لكن بصورة روايه
اشغلتني لين جنّ العقل منها = يالله اني طالبك درب الهدايه
ودي افكر ولكن ليش افكر = دام تفكير البشر من دون غايه
من صغر سني وانا فكري قصيده = لين صارت سيرتي مثل الحكايه
لابغيت اسج عن همـّي اغني = ماحترفت الشعر لكنـّه هوايه
كل شخص بهالزمن يبني طموحه = الصعود الصعب يبغى له درايه
النجوم انشوفها منـّا قريبه = اثر هقوات النظر اكبر جنايه
اسرفت بي لين حبيت المعالي = كل منجز شي مايروي ضمايه
تنخلق هالناس فالدنيا عطاشا = لو سقوها اليم ماقالت كفايه
بعض هالعالم خلقه الله يعاند = ماكتب حرف ويبي يفك القرايه
الغني من عز نفسه في حياته = مامضت دنياه بأموال وحمايه
الجهات اربع وكلٍ في طريقه = ياطريقٍ صح والا درب تايه
ان خذت دنياي والا ماعطتني = خطوتي بالارض واحلامي سمايه
لي معا اهل العشق دربٍ مانسيته = هو سبب جرحي وهو سبّة شقايه
الجفا ؟ فالحب تصريف الحبايب = والفراق يجيك من كلمة وشايه
ولي مع اهل المرجله شيٍٍ طرالي = من بغى الامجاد يصبر فالبدايه
اعشق اللي خوّته كسب المراجل = خوّة الطيّب على الدنيا دوايه
ولي مع اهل العلم درسٍ ماكتبته = لكن اني حافظه حفظ الوصايه
يكفي اني عارفٍ هالكون كله = مايساوي من كتاب الله (آيه)
القصيد احزان وعيوني منابر = والعنا مخلوق من سبّة عنايه
لا لمست الورد يبكي من حنيني = ولاسهرت الليل ذكرني غلايه
منهجي واضح ولا احب اتفلسف = واكره اللي حكيهم كذب ودعايه
ياعيون الشعر ابكي واكتبيني = شاعرٍ موهوب كوّن له ولايه
طرفه ابن العبد غنـّى في شبابه = لين علق له مع اهل السبع رايه
ان رضوا هالناس والا مارضو بي = الثنى لله والحاسد ورايه
عارفٍ قدري ولي فالناس نظره = بشت فيدي فدوته ميـّة عبايه
للشاعر \ناصر بن دهيم
ان شاءالله يعجبكم